الحقيقة وأنا قاعد يوم الجمعة بفكر هأكتب إيه في العمود ده, لقيت الدنيا مولعة عند مكتب الإرشاد في المقطم, سحل وضرب ونار وغاز, قلت بس أنا هأكتب في السياسة وأقلب جد بقى..
الطلاب يخشوا يعملوا Comments و Tweets في السياسة واتصيّت أنا.. قعدت اتخيل النجاح الباهر ده وسرقني الوقت فقلت أنام أحلم بالنجاح ده بقى وآجي من الجامعة تاني يوم أكتب اللي فـ دماغى على رواقة.
وطبعا وأنا نايم حلمت ان كل المشاهير قروا العمود, وان باسم يوسف عملي ريتويت, والحياة بقت فل خالص!
المهم صحيت متفائل جداً ورحت الجامعة الصبح لقيتني اصطبحت بخازوق في Quiz Physics, بس حماسي فضل زي ما هو برضه, لدرجة اني لما روحت البيت مانمتش وقولت هاشتغل على طول..
لأ أصل فعلا بقى, بغض النظر عن أي حاجة.. القضية المرة دي كانت مهمة بجد, و في ناس بتموت و ناس بتتسحل و مستقبل بلد كامل بيضيع.
بس مش عارف في حاجة جوايا كده قالتلي خليك متابع مع الناس أكتر وأفتح الـ Facebook إقرأ آخر أراء الناس علشان تبقى ماشي على الخط يعني وتكَسَر الدنيا.. و الصراحة ياريتني ما فتحت!
الإندهاش الصراحة كان عالي حبتين.. لقيت الـ News Feed كله Shares و تعليقات “ها ها ها” على Posts من صفحة اسمها (GUC Crushes), مافهمتش حاجة وفتحت الصفحة قلت أفهم, أول ما فتحتها لقيت ده:
“Mohamed ….. he is so fuckin hot i want to do thing to him he is so sexy, im a guy btw”
الحقيقة تنحت كده حبة حلوين.. وقررت أشوف Posts تاني بسرعة, على أمل إن اللي أنا شوفته ده يطلع عمَش في عينيا أو أي نيلة, كملت شوية كده لقيت :
“أحبيبة ألبي أهبة”
و
” ahmed el taba3 ♥ “
و
“meserik ya molo7’ya tege ta7t elma7’rata♥”
وللأسف ساعتها تأكدت إن اللي في بالي طلع صح.. أُمال لو البرادعي كان مسِك البلد كنتوا عملتوا إيه يا كفرة؟!
قعدت أتابع الصفحة, “الفانز” بيزيدوا كل ثانية, وأنا اقول لنفسي لأ أكيد في حاجة غلط, دول أكيد داخلين يسفّوا على الأدمن ويهزروا شوية وكده, بس الحقيقة الـ Posts كانت بتزيد أكتر وأكتر..
ده غير إن الجامعات التانية كلها عملت صفحات زي دي وكملت مسلسل الآفورة, وصلت إني لقيت (آداب سوهاج Crushes)!
وبصرف النظر عن ان جالي Crush Posts كتير موت عالصفحة (ايوه حصل!), بس أنا برضه كنت مش مصدق إن إحنا فعلا وصلنا لكده.. يعني مثلا:
” هتمشوا الناس تتلفت حوالين نفسها في الجامعة D:”
للدرجة دي التفاهة وصلت بينا إننا هنمشي نتلفت حوالين نفسنا بسبب صفحة!
تفتكروا عادى ان يبقى كل اهتمامنا الضحك و( هبة واحمد التباع ) والجو ده ؟
طيب حتى لو قلنا عادي التسييح اللي شغال وأسماء البنات اللي عاملة تنزل قدام الناس.. انتوا بذمتكوا تفتكروا إن لو واحد بيحب واحدة بجد, “هيجرّصها” في الجامعة قدام الخلق كلهم كده؟! (يا رجل طب حتى أستر عليها لاحسن يجي واد شبه مهند كده يخطفها منك!)
اكيد أنا مش بهاجم الهزار أو الضحك, عشان كده هكون بأهاجم نفسي أساسا.. بس هل هو عادي لما يكون في واحد أو واحدة قاعدين يعملوا Refresh كل دقيقة عشان يشوفوا اخر بوست على ( GUC Crushes ), وسايبين وراهم مليون الف حاجة مهمة ؟!
للأسف كتير مننا نسي ان الهزار أو الضحك المفروض يكونوا مجرد دفعة كده تدينا طاقة عشان نكمل بقية اليوم..
لكن في الحقيقة الهزار دلوقتي خلاص بقى هو كل حياتنا, ومش مشكلة بقى الإخوان ماسكين في الثوار ولا الثوار بيسحلوا الإخوان ولا مش عارف مين مات ولااتخطف ولا ايه ولا ايه.. ده في ناس ممكن ميحسّوش لو إسرائيل رجعت إحتلت سيناء أساساً!
في الآخر كده حابب أستعين بجملة بقيت بسمعها كتير للأسف: ” ثورة أيه ياعم أنت بتصدق, أيه الفراغ اللي انتوا في ده ! “
أدينا عشنا و شفنا اليوم الذي أصبحت الثورة فيه “فراغاً”, فقط في زمن الـ GUC Crushes …
رايحة بينا على فين يا مصر !
” إبعتوا Commentatko أو الأفكار اللى تحبوا نكتبلكم عنها في التعليقات تحت أو على الهاشتاج “#خلطة_بيتا” ! “
لقراءة عمود الأسبوع الماضي: المعيد و الفتنة الطائفية
يمكنك إرسال إلينا مقال رأي مكون من 3-5 فقرات أو عامود عن طريق comment[at]gucinsider.com أو الرد على مقال مكتوب خلال نفس العنوان.
تنويه: الجريدة غير مسئولة عن دقة ما هو منشور في صفحات الرأي ومشاركات القراء، وهي لا تعبر بالضرورة عن الموقف الرسمي للجريدة.
