في يوم كده كنت ماشى في الجامعة، وشوفت واحدة حلوة مهتمة بنفسها ومتأنقة، فسألت صاحبى اللي كان ماشي بجواري: تفتكر البنت دى في كلية ايه؟ قاللى هى دى محتاجة؟! Applied Arts وش!

سألته ليه الثقة العمياء دي؟ رد و قال: ”دول ناس فاضية ياعم، ماوراهمش حاجة.. بييجوا يصوروا بعض ويلموا قواقع من الارض وشغل لايح كدة، لا عندهم Quizzes  ولا Assignments ولا ميدتيرمات ولا فاينالز ولا وجع الدماغ ده، مش عاوزهم يهتموا بنفسهم ليه يعنى، ما هما فاضيين وراهم ايه ؟!“

قعدت أقول في دماغى معقول الناس دى متدلعة كده ؟ وبعدين إزاى أصلاً يكون فيه ناس متدلعة في ال GUC؟

قلت خلاص، صاحبى ده ”أهطل“ أساساً، فقلت لن أسمع كلامه، هو أكيد بيهذى.

شوية كده وطلعت التوتوريال، المعيد  بيشرح كلام مش مفهوم إطلاقاً و مفيش حد فاهم أي حاجة.. بعدين راح المعيد سأل واحد سؤال، فلمّا معرفش يجاوب، قال له: بص يابنى إنت شكلك مش بتاع بهدلة، روح إنقل Applied Arts، هو ده ال Major اللى هينفعك!

قلت لأ بقى، ده كده الحوار شكله طلع بجد وواضح كمان إن فيه إجماع، وقررت أفهم بنفسى إيه الحكاية، وأقعد مع أى حد Applied Arts يفهمنى ايه الحقيقة في الكلام اللى أنا بسمعه ده.

مكدبش عليكوا الصراحة إنها كانت فرصة إننى أتكلم مع أى واحدة Applied Arts وأستغل الموقف ده.. طلعت ال Club Area، نشنت على أكثر واحدة ”ستايل“ و ذهبت أتكلم معاها..و يا ريتني ما عملت كده!

”صباح الخير! أنا فادى جميل، وكنت حابب أتعرف -إحم- قصدى أعرف شوية معلومات كده عن Applied Arts“. البنت ردت عليا بكل برود: ”بس انا مش Applied Arts على فكرة!“.. طبعاً وجهي قلب ألوان، وقررت خلاص، أحترم نفسى وأرجع اسأل واحد من أصدقائي اللى اعرفهم وكفاية إهانة على كده أوي.

المهم رجعت البيت وكلمت واحد حبيبى، لسه بأحكيله و بقوله ”هو انتوا فعلا متد..“، قبل مأكمل الجملة راح مزعق في وجهي وأهاننى يمكن أكثر من البنت بتاعت ال Club Area (أو مش أوي يعني).

الولد طلع ”شايل ومعبى“ وعلى آخره ياعينى.. فضل ساعتين يرغى في كلام أنا مفهمتش منه كلمة الحقيقة، بس كل اللى أنا جمعته إن عندهم ميد تيرمات طول السيمستر مش في أسبوع واحد زي هندسة و صيدلة، وإن عندهم Assignments على طول، وحاجات نظري فيها مذاكرة و دحّ عادى جداً، ومش عارف ”Evaluations“ على طول علشان الدكاترة يتأكدوا إن الطلبة فهمت الكلام كله، ده غير الفاينالز طبعاً.

وقال لي كمان إن لو أى حاجة من الحاجات دى وقعت فيها، بتأخذ F ”وقتى كده“، ومالهومش Make Ups، يعنى هيلبس الكورس كله من أول وجديد.

اللى أنا وصلتله في آخر الحوار ده الحقيقة، بغض النظر عن حتى لو كان في أي مبالغات من صديقي ده، هو نفس اللى أنا كنت مقتنع بيه قبل الحوار..

مفيش أى كائن داخل هذه الجامعة ”اللعينة“ هيفلت من جحيمها، طلبة Applied Arts دول بيطلع عينيهم زيهم زى أى كلية تانية، وإن من غير الطلاب اللى إنت بتقول عليهم (سيس) دول، مكنش هيبقى فيه البوستر اللى عاجبك بتاع الفيلم اللى بتتفرج عليه أو الكتاب اللى بتقرأه أو الألبوم اللى بتسمعه، ماكنتش هتلاقى حد يعملك ديكور بيتك او شركتك، ماكنتش هتلاقى حد يصمملك تيشيرت فريق الكورة اللى انت قاعد 24 ساعة بتتفرج عليه، ولا كنت هتلاقى إعلانات تسليك وإنت واقف على المحور ساعة بعد ما رجعت من الساحل.حتى لو كنت مستغني عن كل ده، فدي مجرد أمثلة لأبسط حاجات الناس دي بتعملها علشاننا.

لكن الحقيقة بقي.. الحاجة الوحيدة الجديدة اللى اتعلمتها و عمري ما هأقدر أنساها، هى إنّى عمرى ما هأكلم أى بنت غير لما أكون متأكد من ال Major بتاعها الأول!

إبعتوا Commentatko أو الأفكار اللى تحبوا نكتبلكم عنها في التعليقات تحت أو على الهاشتاج ”#خلطة_بيتا“!

لقراءة عمود الإسبوع الماضي: زيادة المصاريف، بين المكسب والنفخ.

يمكنك إرسال إلينا مقال رأي مكون من 3-5 فقرات أو عامود عن طريق comment[at]gucinsider.com أو الرد على مقال مكتوب خلال نفس العنوان.

تنويه: الجريدة غير مسئولة عن دقة ما هو منشور في صفحات الرأي ومشاركات القراء، وهي لا تعبر بالضرورة عن الموقف الرسمي للجريدة.