طبعاً الدنيا مقلوبة دلوقتى في الجامعة وبين الطلبة عامةً على حوار إن فيه معيد فيزياء بيدّرس لسنة أولى (أو كان بيدّرس) بَعَت حاجات اُعتبرت مسيئة للطلاب المسيحيين.
أولاً hints كده عن الـ TA عشان تبقوا معانا على الخط.. هو راجل متدين علامة الصلاة في وشه وملتحي، أما بالنسبة للتدريس فهو راجل ممتاز على المستوى التعليمي يعنى (وربنا يسامحني على الكدب ده). المهم أنا مش قادر أفهم ليه الجامعة استبعدته بصراحة بعد تنفيذه لفكرة عظيمة جداً. هو عارف كويس أوي إن الطلاب في السن ده طايشين ومش منظمين فقرر يبعتلهم Mail يساعدهم بيه على تنظيم الوقت، الـ Mail ده اتنشر امبارح وأعتقد مصر كلها شافته. عامةً الّي ماشفهوش يدوس هنا.
وبصرف النظر عن النوم مع الكتاكيت الساعة 10 بليل والصحيان الساعة 4 الفجر، وبصرف النظر إنه بيطلب من العيال إنهم يذاكروا Serway، وبصرف النظر عن إنه مخصص وقت لزيارة الأقارب الّى أنا نسيت شكلهم، بس أنا عتابي الوحيد عليه إنه نسي إن فيه يوم الجمعة من 8-6 ماتش الزمالك، إيه التهريج ده! (أيوه أنا زملكاوي)..
لكن الحقيقة أنا بعد ما قريت الإيميل بتمعن، اللى اتأكدت منه إني مش محتاج استظرف أو أحاول استخف دمي تاني خلاص في العمود هنا. أعتقد أن الـ Mail ده قام بالواجب وزيادة حبتين.
و علي العموم.. ربنا أعلم بقي بالنوايا والّي في القلوب.
آه صحيح، كنت حابب أطلب منكم تفتحوا الأربع Youtube Links دول الّي كانوا في الإميل:
The Truth About Jesus Christ by Abdur-Raheem Green
The Deen Show: Can you explain the Trinity?
Christian takes down in tears after an answer by Sheikh Yusuf Estes
الشيخ أحمد ديدات يرد بقووه على نصرانيه تتكلم عن الحجاب
الأربعة Links دول من مجموع (العوشروميت) فيديو اللي الراجل الفاضل حاططهم نتفرج عليهم يوم السبت من أربعة لخمسة وسبع دقايق دول، – نتكلم حبة جد بقى – الفيديوهات دي كلها طعن مباشر في العقيدة والديانة المسيحية وفي المسيحيين نفسهم، وعلى فكرة الـ TA بعت الـ Mail ده وهو عارف كويس أوي أوي إنه هيوصل لطلاب مسيحيين عادي خالص، ومحدش يقوللي ميقصودش لو سمحتوا، ما عادش فيه حد عبيط فى زمن (فريسكا) و (راحت عليكى يا زوزو)!
الظاهر إن الراجل المتدين اللي مطلق لحيته (يعنى بيتبع السنة النبوية الكريمة) نسي إن ممكن بحاجة زي كدة يوقظ الفتنة النائمة، ناقصين أصلنا كمان.. راجل بيشتغل في جامعة (المفروض أنها) محترمة وليها سمعة ومش أي حد يشتغل فيها يطلع يعمل فتنة في الدين، اللى هو أكتر قضية حساسة عندنا في مجتمعنا.
مش كفاية طول النهار فتنة وخناق في أى حاجة ليها لازمة أو مالهاش، برة الجامعة أو جواها! بنتخانق في السياسة وبنسِب لبعض عشان الكورة وعشان مين هيكسب في (The Voice).. ده إخواني خروف وده شيوعي ملحد، وده ليبرالي كافر..
ده أنا أقسم بالله إني بعد الثورة على طول ركبت مع سواق تاكسي وقاللي بالنص كده ”إنت عارف ايه السبب اللي وقع مبارك؟ عشان مجبلناش كرامتنا وحقنا في حوار الجزائر يا بيه!“.. ده غير الخناقة المعتادة واللي (الشعب المتدين بطبعه) بيسِب فيها الدين بعد كل ماتش ريال مدريد وبرشلونة، آه هما بتوع أسبانيا والله، أو بتوع ”الأندلس التى سوف تعود يوماً ما بعون الله“، ده إحنا وصلنا للفتنة في إن مين أحلى: مهند ولا كريم؟!
للأسف كل واحد فينا بقى ياخد الحتة اللي على مزاجه بس فى الدين ويطنش الباقي، الحتة اللى تجبله (كراسي) أو الحتة اللي تخليه يبان TA يخاف الله مثلاً فالطلاب تحترمه وتنسى فشله – على أساس إن الطلاب هُبل مثلاً، أصل إحنا لو كنا كلنا فعلاً تدينّا صح والتزمنا بتعليمات دياناتنا كلها – مش اللى عاجبنا بس – كان زمان حالنا مبقاش كدة خالص!
مش عاوزين ننسى إنه على غير العادة، الإدارة افتكرت إنها مسؤولة عن جامعة محترمة وأخدت قرار بوقف المعيد عن العمل إمبارح (بعد ستة أيام من إرسال الإيميل بالتمام والكمال!). والحقيقة،أنا بعد القرار ده حابب أقول: أنا مش مع إدارة الجامعة، بس باحترمهم!
وعامةً سواء إدارة الجامعة كانت أخذت قرار أو طنشت مكنتش هتفرق كتير.. أصل مش واحد ولا عشرين ألف زي الأستاذ الفاضل هيقدروا يوقعوا بين الطلبة!
سواء كانت إدارة الجامعة اللي كانت عاملة نفسها نايمة لمدة 6 أيام.. أو المعيدين اللي زي الأستاذ الفاضل، أو حتى أي طالب ممكن يكون مؤيد لوجود فتنة، أما حاجة زي كدة تحصل تانى من الـ Staff بتاعنا (المتنقي واحد واحد)، الطلاب هيكونوا عارفين كويس أوي إزاي يصدّوها!
إبعتوا Commentatko أو الأفكار اللى تحبوا نكتبلكم عنها في التعليقات تحت أو على الهاشتاج “#خلطة_بيتا” !
لقراءة عمود الأسابيع الماضية: البنوتة و فارس الأحلام؟ – الطالب عندنا بيتعلم.. عليه!
يمكنك إرسال إلينا مقال رأي مكون من 3-5 فقرات أو عامود عن طريق comment[at]gucinsider.com أو الرد على مقال مكتوب خلال نفس العنوان.
تنويه: الجريدة غير مسئولة عن دقة ما هو منشور في صفحات الرأي ومشاركات القراء، وهي لا تعبر بالضرورة عن الموقف الرسمي للجريدة.
